Tvíþættur vandi og velferðarsvið.

Það var í fréttum um daginn að borgaryfirvöld ætla að leggja áherslu á að taka á fjölþættum vanda barna og ungmenna á næstunni.  Það kemur þá í hlut velferðarsviðs að taka á málinu sem er brýnt,  því börn og ungmenni með tvíþættan vanda velkjast um í kerfinu árum saman.  Það eru einnig börn og ungmenni með tvíþættan vanda sem fá enga markvissa meðferð og enda á götunni í vímuefnum og fara oft út á glæpabrautina.  Það er fagnaðarefni að borgaryfirvöld ætla að taka markvisst á málinu og á það að geta verið hvatning fyrir geðsvið að marka eina heildarstefnu fyrir börn og ungmenni með tvíþættan vanda.  Óneytanlega finnst manni það standa geðsviði nær en velferðarsviði að taka á þessu alvarlega máli þótt ég fagni því að borgaryfirvöld sýni frumkvæði í mjög alvarlegu máli.  Það er fátt sorglegra en að vita af börnum og ungmennum jafnvel niður í ellefu ára aldur ánetjast eiturlyfjum vegna vanlíðunar af völdum geðrænna sjúkdóma og fá enga aðstoð eða brotakennda aðstoð.  Mér er hugsað til greinar minnar hér að neðan sem fjallar um persónulegan umboðsmann einstaklinga með geðfötlun.  Það er margt vitlausara en að borgaryfirvöld hugi að því að koma á laggirnar þessum persónulega umboðsmanni fyrir börn og ungmenni með tvíþættan vanda.  Það felst öryggi í því að láta ábyrgan aðila vera í sambandi við börnin og ungmenninn, þá myndast ekki rof í meðferðinni sem getur verið mjög slæmt.  Persónulegur umboðsmaður getur einnig verið fyrsti kostur þegar í upphafi þegar borgin er að uppgötva að einstaklingar þarfnast aðstoðar.  Persónulegur umboðsmaður getur ef með þarf komið einstaklingunum í viðeigandi meðferð eða verið einn um að sinna einstaklingnum ef það hentar betur.  Það er mismunandi hvernig einstaklingarnir eru staddir og hvers konar úrræði henta best þegar í upphafi.  Ég hef trú á að persónulegur umboðsmaður eigi auðveldara með að vinna traust einstaklings en ef  það væri fulltrúi kerfisins.  Kerfið er stofnannamiðað og margir óttast kerfið eða fulltrúa kerfisins, það er örugglega oft auðveldara að treysta einstaklingi sem er óháður kerfinu eins og persónulegum umboðsmanni.  Það er eðlilegra að stunda meðferð í nærumhverfi einstaklingsins heldur en að hrúga inn á sjúkrahús, árangurinn í Svíþjóð af meðferð utan sjúkrahús hefur ekki látið á sér standa. Það er komin tími til að hreyfing komist á mál barna og ungmenna með tvíþættan vanda, það er tilefni til að fagna frumkvæði borgarinnar í þessum málaflokki.  Ástandið í þessum málum er slæmt og gjalda börn og unglingar fyrir,  það vantar frumkvæði frá geðsviði til að taka faglega, markvistt og móta heildarstefnu í þessum málum.  Velferðarsvið borgarinnar á heiður skilin fyrir að ætla að taka markvisst á þessum málum og vonandi huga borgaryfirvöld að því að koma á laggirnar sænska kerfinu með persónulegum umboðsmanni, þá á árangurinn ekki eftir að láta á sér standa.