Læknisfræði fortíðar og /eða nútímans.

Linn Getz  ,,læknisfræðin hefur málað sig út í horn með því að einblína um of á líffræði líkamans og hunsa mikilvægi ævisögu og umhverfis sjúklinga.  Linn Getz bendir á að nýjustu rannsóknir renni stoðum undir að huga beri að aðstæðum fólks þegar líkamlegir kvillar eru teknir til skoðunar".  Linn Getz er norsk hún er trúnaðarlæknir landsspítalans og dósent í heimilislæknisfræði við háskólann í Noregi, hún hefur búið hér á landi frá 1996, hún er gift Jóhanni Ágúst Sigurðssyni prófessor í heimilislækningum.  Í febrúar s.l. las ég athyglisverða grein á vefsíðu Hugarafls, það er viðtal við framangreinda Linn Getz en hún hlaut norrænu rannsóknarverðlaunin í heimilislæknisfræði árið 2011 fyrir brautryðjendastörf á framangreindu sviði.  Ég dáist að hugrekki þessara merkilegu konu sem Linn Getz er, það eru ekki margir læknar hér á landi sem þora að opinbera þá skoðun (ef þeir eru á þeirri skoðun) að umhverfisþættir spila stórt hlutverk á bæði líkamlega og andlega heilsu.  Linn Getz segir m.a.  ,,Mig hefur langað til að varpa ljósi á það að ævi fólks og aðstæður hafa líffræðileg áhrif á líkamann.  Tungutak læknisfræðinnar hefur hins vegar varla leyft þessa nálgun undanfarna áratugi.  Nú hafa hins vegar birst rannsóknir úr heimi náttúruvísinda , sem sýna fram á áhrif umhverfis, uppeldis og atlætis á líkama fólks og heilsu". Mér hefur oft fundist læknisfræðin úti á túni þegar er verið að dæla endalausum lyfjum í einstaklinga þegar oft má rekja vandamálið til umhverfisins eða tiltekinna atburða.  Linn Getz lætur ekkert stoppa sig í að endurskrifa nýjar grundvallarástæður fyrir heilsubresti (bæði líkamlegum og andlegum).  Hún heldur áfram og segir  ,,það láta nærri að innan læknastéttarinnar hafi stundum lítið verið gert úr læknum sem hafi sýnt áhuga ævisögu og lífsskilyrðum sjúklinga sinna.  Núna sýna rannsóknir hvernig lífsreynslan skrifi sig inn í líkamann og hafi víðtæk áhrif á heilsu og sjúkdóma.  Því hún fái mjög þakklát viðbrögð við fyrirlestrum sínum fyrir lækna sem þakka henni fyrir innblástur og hvatningu til að ræða við sjúklinga.  Læknar segja mér að þeim hafi liðið eins og í spennitreyju, allt hafi gengið út á líffræði líkamans og aðstæður fólks ekki átt að skipta máli.  Hugur og líkami eru órjúfanleg heild og það sem við upplifum getur haft mikil áhrif á líkama okkar.  Það er t.d. ekki óalgengt að þeir sem þjást af vöðvaverkjum eða vefjagigt eigi sér erfiða fortíð", segir Linn Getz.  Hún slær hvergi af, Linn Getz heldur áfram og segir t.d. "gagnrýnivert  að líta á þunglyndi sem bara líffræðilegan sjúkdóm sem spretti upp án utanaðkomandi skýringa".  Það er stórkostlegt að heyra vel menntaðan lækni tala svo opinskátt og skorinort um kollega og eigin menntun, lýsingar Linn Getz koma ekki á óvart það hefur lengi verið vitað að sumir læknar hafa ekki hugrekki til að fara fram með nýjungar sem eru ekki almennt viðurkenndar í læknasamfélaginu enn sem komið er. Sumir læknar eru í spennitreyju og hreinlega kúgaðir af félögum til að þegja um nýjungar sem snerta allt annað en líffræðilega þætti. Læknisfræðin hefur notast við gamaldags aðferðir þar sem allt miðast við líkamann og þeir líta jafnvel á manninn eins og vél sem þarf að tjasla uppá öðru hvoru. Linn á sannarlega kollgátuna og ég vona að hún nái eyrum sem flestra kollega sinna því þá mun meðferð við mörgum sjúkdómum breytast mikið og einnig afstaðan til sjúkdóma sem er sannanlega tímabært. Í þessari blogggrein styðst ég við greinina á vefsíðu Hugarafls, Sigríður Björg Tómasdóttir tók viðtalið við Linn Getz sem í upphafi byrtist á vísi.is 13. ágúst 2011.