Árangur 70% í sálfræðimeðferðum á heilsugæslustöð.

Heilbrigðisráðherra upplýsti um það fyrir nokkru síðan að fyrirmyndin að því að ráða sálfræðinga inn á heilsugæslustöðvarnar sé komin frá Bretlandi.  Bretar tóku upp þá stefnu í geðheilbrigðismálum árið 2008 að bjóða uppá fría sálfræðimeðferð á heilsugæslustöðvum.  Bretar hafa þá líklega staðið frammi fyrir svipuðum staðreyndum og við íslendingar,  þ.e. að mikill fjöldi fólks sem leitar til heilsugæslunnar er með einkenni sem má rekja til geðrænna erfiðleika eins og kemur fram í blogggreininni hér á undan.  Fyrir nokkrum vikum síðan  (er því miður ekki með dagsetningu) var á fréttavef rúv vitnað í David M. Clark en hann er professor við Oxford háskóla og ráðgjafi Breska heilbrigðisráðuneytisins á sviði geðheilbrigðismála.  Í  þessari frétt á fréttavef rúv segir hann ,,þetta er engin spurning, frá efnahagslegum sjónarhóli er fráleitt að taka ekki upp þessa stefnu, sérstaklega ef efnahagsástandið er bágt.  Breska geðheilbrigðisstefnan sparar ríkinu gífurlegar fjárhæðir og eykur hamingju fólks til muna".  Ég hef til margra ára verið á þeirri skoðun að menntun sálfræðinga hér á landi hefur ekki notið verðskuldaðrar virðingar og þeir hafa allt of mikið fallið í skuggann af geðlæknum.  Hingað til hefur geðmeðferð hér á landi einkennst af stærstum hluta af einsleytni (lyfjameðferð) þegar kemur að meðferðarformum, má hiklaust rekja það m.a. til þess hve geðlæknar hafa haft mikil ríkjandi áhrif innan geðheilbrigðiskerfisins, mannauðurinn sem felst í menntun sálfræðinga hefur verið mjög vannýttur og lítils metin.  Það kætir mig óneytanlega að fá núna staðfestingu á að það næst 70% árangur í sálfræðimeðferðum á einni heilsugæslustöð á Bretlandi að sögn á fréttavef rúv.  Á næstu árum stefna Bretar að því að ná 70% árangri með sálfræðimeðferðum á fleiri heilsugæslustöðvum.  Þetta er frábær árangur og má furðu sæta að sálfræðimeðferðir skuli hafa verið allt of lítið notaðar hingað til.  Það kom fram í einum Kastljósþætti núna í febrúar að það fer núna fram lífleg umræða í Bandaríkjunum um önnur meðferðarúrræði en lyfjagjafir við ákv. geðrænum einkennum.  Það er komin tími til, þessi umræða hefur aðeins að litlu leyti náð inn í opinbera umræðu hér á landi,  ég trúi því að þessi umræða verði meira áberandi þegar búið verður að innleiða í meira mæli sálfræðimeðferð inni á heilsugæslustöðvunum hér á landi.  Sálfræðingar eiga að vera kröfuharðari sérfræðingar í opinberri umræðu um þennan málaflokk, þeir hafa meira en góð efni á að hreinlega setja sig á háan hest í umræðunni.  Professor David M. Clark talar einnig um að það spari gífurlegar fjárhæðir að bjóða uppá fría sálfræðimeðferð,  þetta er eitthvað sem kemur ekki á óvart og hef ég m.a. skrifað um þessa augljósu staðreynd hér á blogginu.  Ég get upplýst um að fyrir hverja krónu sem er eytt í meðferð sem ber árangur sparast tvær krónur, þetta safnast þegar saman kemur og verður að gífurlega háum fjárhæðum þess vegna er mikilvægt að sem flestir sem eiga við andlega vanlíðan að stríða leiti eftir aðstoð.  Það felst mikill ávinningur í að opna umræðuna um þann falda heim sem hefur einkennt andleg veikindi, en það horfir til bóta því að s.l. tvö ár hefur orðið vakning um þessi mál og er afskaplega gaman að sjá hve fjölmiðlar hafa verið virkir í að taka á þessum málaflokki.