Ferðaþjónusta fatlaðra

Á undanförnum vikum hefur mikið verið fjallað um ferðaþjónustu fatlaðra sem strætó sér um, eftir útboð á ferðaþjónustunni sem fór fram á s.l. ári þá hefur þjónustan verið óviðunnandi með öllu og gjald fyrir aukaþjónustu hefur hækkað mikið.  Svo mikið hefur brugðist að málið hefur ratað inn á borð hjá borgarstjórnar þar sem var tekið á málinu.  Við endurskipulagningu á þjónustunni þá var m.a. fötluðum einstaklingum sem starfa í þjónustuverinu hjá ferðaþjónustunni sagt upp starfi en þeir eru með áralanga reynslu í þjónustuverinu hjá ferðaþjónustunni.  Þessit fötluðu einstaklingar sem var sagt upp starfi voru í hlutastarfi en þeim var boðið vaktavinna og fullt starf eftir breytinguna.  Það lýsir takmörkuðum skilningi á aðstæðum fatlaðra að þeim eingöngu fullt starf, fatlaðir einstaklingar hafa oft takmarkað starfsþrek og geta ekki sinnt fullu starfi af ýmsum ástæðum.  Það getur einnig spilað inní að ef fatlaðir einstaklingar hafa of miklar tekjur þá skerðast réttindi þeirra hjá tryggingastofnun sem kemur í veg fyrir að þeir geti sinnt fullu starfi.  Það er frámunalega lélegt hjá strætó að taka ekkert tillit til erfiðra aðstæðna sem margir fatlaðir einstaklingar búa við.  Strætó metur einskis þá miklu starfsreynslu sem viðkomandi einstaklingar búa yfir eftir margra ára starf í þjónustuverinu hjá ferðaþjónustunni.  Strætó velur að láta mikla reynslu og þekkingu fara fyrir lítið í stað þess að njóta góðs af reynslunni og þekkingunni.  Ég læt engan segja mér að það hafi ekki verið hægt að steypa saman tveimur fimmtíu prósent störfum í eitt hundrað prósent starf og láta tvo einstaklinga skipta á milli sín einu hundrað prósent starfi. Það verður að segjast eins og er að manni finnst hafa tekist óvenju illa til við endurskipulagningu hjá ferðaþjónustunni fatlaðra eftir að strætó tók við þjónustunni.  Til að bæta gráu ofan á svart þá er tímapressan á bílstjóranna í nýja kerfinu það mikil að einhverjir bílstjórar hafa sagt upp starfi.Það lítur út fyrir að nánast allt hafi farið úrskeiðis við útboðið og endurskipulagninguna á s.l. ári.  Það má vera að sparnaðurinn við breytinguna hafi átt að vera það mikill að starfsemin stendur eftir hálf lömuð.  Mér sýnist ekki vanþörf á að allt uppboðsferlið og endurskipulagningin verði endurskoðað og uppsagnir á reynslumiklu fötluðu fólki í þjónustuverinu dregnar til baka.