Velferðarsvið og sjálfræðissviptingar.

Í þessum pistli vil ég gera að umtalsefni sjálfræðissviptingar og velferðarsvið, nýlega tóku  þær reglur gildi að núna sér velferðarsvið um að svipta einstaklinga sjálfræði.  Velferðarsvið er þá væntanlega í samráði við geðdeild og aðstandendur að taka  það hlutverk  af aðstandendum að sjá um sviptinguna sjálfa.  Með þessu fyrirkomulagi er augljóslega verið að hlífa aðstandendum við að draga sér nákomna fyrir dómstóla.  Það er verið að hlífa aðstandendum við því versta í annars mjög grófu og úreltu ferli sem sérfræðingar leika enn í dag stærsta hlutverkið í.  Ég hef heyrt óánægjuraddir með þetta nýja fyrirkmulag, sjálf er ég í þeim hópi sem er óánægð með nýja fyrirkomulagið.  V issulega er það mikið álag á aðstandendur  draga sína nánnustu fyrir dómstóla og svipta þá sjálfræði.  Það er líka gífurlegt álag fyrir einstaklinganna sjálfa að fara fyrir dómstóla og að vera sviptur sjálfræði.  Ferlið allt sem tengist nauðungarvistun og sjálfræðissviptingu er skelfilega gróft og framkallar streituröskun til langs tíma, ferlinu öllu verður að breyta eins og það snýr að fórnarlambinu. Með nýju breytingunni er eingöngu verið að hlífa aðstandendum en fórnarlambið þarf eftir sem áður að þola mikið andlegt ofbeldi.  Það breytir stöðunni mikið að láta velferðarsvið sjá um sjálfræðissviptingar jafnvel þótt velferðarsvið sé í samráði við aðstandendur.  Velferðarsvið er stofnum, kerfi þar sem skilningur, væntumþykkja eða tilfinningar er útilokað og allt hjálpræði eins og aðstandendur sýna er útilokað.  Núna er málið komið í hendur á ísköldu, tilfinningalausu kerfi sem sýnir enga miskunn og útilokar allar mannlegu hliðarnar á málinu.  Hér er heldur betur verið að herða tökin á fórnarlambinu og breyta mjög grófu ferli í enn harðara og miskunnarlausara ferli.  Það er ekkert hugsað um að bæta þetta hrikalega gamaldags kerfi gagnvart fórnarlambinu heldur er farin þver öfug leið og ólin hert enn frekar.  Í gamla kerfinu var allt gert til að reyna að fela slóð aðstandenda og í nýja ferlinu er reynt að taka alla ábyrgð af aðstandendum.  Hvers vegna er svona rík áhersla lögð á að taka sem mesta ábyrgð af aðstandendum á kostnað fórnarlambsins.  Ég hef reynslu af að mín brotna fjölskylda notaði nauðungarvistun og sjálfræðissviptingu sem öruggt og pottþétt stjórntæki þar sem allir voru fríaðir af að axla ábyrgð á minn kostnað.  Þegar ég tek mið af minni reynslu þá var stigið kolrangt skref þegar velferðarsviði var falið að sjá um sviptinguna.  Hefði aðstandendum mínum verið gerð grein fyrir hve afdrifaríkar afleiðingar sjálfræðissvipting hefur í för með sér, þá er ég viss um að þeir hefðu hugsað sig tvisvar um.  Ég er líka viss um að aðstandendur mínir hefðu hugsað sig tvisvar um ef þeim hefði verið gerð grein fyrir að ábyrgð þeirra er mikil.  Ég er á þeirri skoðun að það sé verið að renna blint í sjóinn og bjóða hættunni heim ef fólk er fríað við að axla ábyrgð ég tala nú ekki um í alvarlegum málum.  Kötturinn í sekknum getur skotið upp kollinum við ýmsar aðstæður sem margir sjá ekki fyrir.